Noni e Niuc

Po’ i Noni de le olte i va a fa na caminadò, e i ciciarò.

– Spacò la legno che n’pisom l’fòch, 
n’tat me tire fò la sener, chelò che i ga lasat i gnari
che e sò quasi tòte le duminiche; 
lur i la netò mai l’fòch, gne se i ga la dis i alpini.

– Ma gom chi de fa còser? Me go re nient eh.

– Ma n’det a pensa chi po’? gom apenò de scaldas;
me go fret e so tòt sùdat; som gnic sò de lenò eh!

– Chi po’, de lenò? ta ga orareset quan che n’dom me e Carlì.
Oter che ise; sòmeom dò caalete e sa fermom mai,
fom miò come n’cò; pòtò, te ta set po’ èc de noter!

– Còntet sò chi po’? sèt agn de po’ de te, e sares vèc?
Ta set te èc de co, come Carlì.
Chei de la ostò età i vòl fa come i faò na oltò, quan che tòc i curiò.
Ades, po’ i zuegn i cor po’, i va adagino e i sa la got, i ga mai fresò.

– Se l’è per chel ta ghet risù; i ve sòl mont, 
i riò al convent, o che, e ga sòmeò de igò fat l’Adamel,
e se i va a Zone, i vòrares fa tòte le sime,
ma i riò gne al Vignòle; i n’darès almeno n’Gòlem!

– Pòtò, i ga n’del co tòt chel che ga nsegnò “internet”
che l’sta deter la scatulinò che i nos noni i dòperao per l’tabac.

– Pensò che me niut l’ga ist Messner n’televisiu, e l’ma dit: 
“Nono, go ist l’nono de Sinner; almeno a me l’ma sòmeat;
l’è prope precis a lù, po’ se l’è ec. Erel brao come lù?”
Me niut l’ma la dit ‘n’italiano neh! l’parlò apenò chel! 

E me go dit: – Po’ de po’, l’dòperaò le rachete sul quan che ghiò la nef.
E lù: “Che fenomeno! E la balinò sò la nef rimbalsaelò?”
– Certo, quan che la nef l’iò giasadò.

– Ades fomei chi?

– Scaldonsò amò n’brisinì, e po’, n’tat che ghè gnemò la nef,
riom almeno n’finò a la crus de Cocai.

– Quan che ga sarà la nef dùperarom le rachete,
come l’fa l’nono de Sinner.

– Ma sensò la balinò eh!.

SCARICA QUI LA TRADUZIONE

– Domenico Franzelli

---